திருச்சி: AIRRBEA நடத்தும் தற்காலிக ஊழியர்களுக்கான சிறப்பு பொதுக்கூட்டம்

இந்நிலையில், இன்று (09.11.2024 சனிக்கிழமை) காலை 10.30 மணி அளவில் திருச்சி மாவட்டம் அரியமங்கலம் பகுதியில் ஸ்ரீ சார்லஸ் மஹாலில் கிராம வங்கிகளில் பணிபுரியும் தற்காலிக ஊழியர்கள் கலந்து கொள்ளும் சிறப்பு கூட்டம் நடைபெறுகிறது.

இந்த சிறப்பு கூட்டம் குறித்து வெளியான அறிவிப்பில் , கிராம வங்கிகளில் அனுமதிக்கப்பட்ட அலுவலர், காசாளர் ஆகிய பணியிடங்களுக்கு மட்டுமே முறையாக ஆட்கள் தேர்வு செய்யப்பட்டு நிரந்தர பணியாளர்களாக பணியாற்றி வருகின்றனர். அதற்கு அடுத்து இருக்கும் மெசேஞ்சர் உள்ளிட்ட பணியிடங்களுக்கு தற்காலிக ஊழியர்களே தொடர்ந்து நியமிக்கப்பட்டு வருகின்றனர். இப்படியாக இந்திய கிராம வங்கிகளில் சுமார் 35 ஆயிரம் தற்காலிக ஊழியர்கள் பணியாற்றி வருகின்றனர்.

இப்படி பணியாற்றும் தற்காலிக ஊழியர்களை பணி நிரந்தரம் செய்ய கிராம வங்கி ஊழியர் சங்கங்கள் தொடர்ந்து வலியுறுத்தி சட்ட போராட்டங்களை தொடர்ந்து நடத்தி அவ்வப்போது அதில் வெற்றியடைந்தும் வருகின்றனர். ஏற்கனவே, பாண்டியன் கிராம வங்கியில் 35 தற்காலிக பணியாளர்களுக்கு பணி நிரந்தரம் செய்யப்பட்டது. அதேபோல, ஆந்திர பிரதேசம் விகாஸ் கிராம வங்கியில் சுமார் 460 தற்காலிக ஊழியர்களுக்கு பணி நிரந்தரம் செய்யப்பட்டுள்ளது. இந்த வெற்றிகள் கிராம வங்கி ஊழியர் சங்கங்கள் நடத்திய சட்டப் போராட்டத்தால் கிடைத்தது என்றும், இப்படியான சூழலில் இச்சங்கங்கள் மூலம் முன்னெடுக்கப்பட்டுள்ள முயற்சிகளை ஊழியர்களுக்கு விளக்கிடவும், அனைவருக்கும் பணி நிரந்தரம் எனும் இலக்கை அடைய உதவும் பயணம் குறித்த ஒரு சிறப்பு கூட்டமானது இன்று நடைபெறுகிறது என்றும் கிராம வங்கி ஊழியர் சங்கங்கள் வெளியிட்ட சிறப்பு கூட்டம் பற்றிய அறிவிப்பில் குறிப்பிடப்பட்டுள்ளது.