தங்கக் கடன் விதிகளை மீறினால் கடும் நடவடிக்கை.! எச்சரித்த நிர்மலா சீதாராமன்!

கடந்த காலங்களில் வங்கிகள் மற்றும் நிதி நிறுவனங்கள் தங்கக் கடன் வழங்கும் முறையில் விதிகளை மீறுவதாக புகார்கள் எழுந்துள்ளன. இதனை மத்திய அரசு, ரிசர்வ் வங்கி (RBI) மற்றும் அரசு தொடர்புடைய கண்காணிப்பு அமைப்புகள் தீவிரமாக ஆய்வு செய்து வருகின்றன. இந்த சூழலில் அதன் ஒரு முக்கிய நடவடிக்கையாக வங்கிகள் தங்கக் கடன் விதிகளை மீறினால் கடுமையான நடவடிக்கை எடுக்கப்படும் என நிதி அமைச்சர் நிர்மலா சீதாராமன் திட்டவட்டமாக அறிவித்திருக்கிறார். 

தங்கக் கடன் – நடைமுறைகள் என்ன? 

வங்கிகள் மற்றும் நிதி நிறுவனங்கள், தங்கத்தை அடமானமாக வைத்து கடன் வழங்கும் போது, ரிசர்வ் வங்கி (RBI) வகுத்துள்ள சில முக்கிய வழிகாட்டுதல்களை பின்பற்ற வேண்டும். அதில் சில முக்கியமான விதிகள் என்னவென்று கீழே கொடுக்கப்பட்டுள்ளது. 

1. LTV (Loan-to-Value) விகிதம்

வங்கிகள் தங்கத்தின் மதிப்பை அடிப்படையாகக் கொண்டு மட்டும் கடன் வழங்க வேண்டும். LTV (கடன்-மதிப்பு விகிதம் அல்லது வாழ்நாள் மதிப்பு)  விகிதம் 75% ஆக மட்டுமே நிர்ணயிக்கப்பட்டுள்ளது, அதாவது, ஒருவரின் தங்கத்தின் மதிப்பு ரூ.1,00,000 என்றால், அதிகபட்சமாக ரூ.75,000 மட்டுமே கடனாக வழங்கலாம். சில நிதி நிறுவனங்கள் LTV விதியை மீறி அதிகளவு கடன் வழங்குவதாகவும், இதனால் திருப்பிச் செலுத்தும் போது கடுமையான விளைவுகள் ஏற்படுவதாகவும் புகார்கள் எழுந்துள்ளன.

2. வட்டி வீதம் மற்றும் கட்டணங்கள்

வங்கிகள் நியாயமான வட்டி வீதத்துடன் தங்கக் கடன் வழங்க வேண்டும். சில நிதி நிறுவனங்கள் அதிக வட்டி வீதங்களை விதித்து, வாடிக்கையாளர்களை திசைதிருப்பும் நடவடிக்கைகளில் ஈடுபடுகின்றன. குறிப்பாக, கூடுதல் கட்டணங்கள் (Processing Fees, Foreclosure Charges) விதித்து, வாடிக்கையாளர்களிடமிருந்து அதிகமாக பணம் வசூலிக்கின்றனர்.

3. தங்கத்தின் சரியான மதிப்பீடு

வங்கிகள் தங்கத்தின் தூய்மையை சரியாக மதிப்பீடு செய்ய வேண்டும்.

சில நிறுவனங்கள் தங்கத்தின் மதிப்பீட்டை வேண்டுமென்றே அதிகப்படுத்தி, LTV விகிதத்தையும் மீறி முறைகேடுகளுக்கு இடமளிக்கின்றன. இது கடன் வழங்கும் நிறுவனங்களுக்கு மட்டுமல்ல, கடன் வாங்கிய வாடிக்கையாளர்களுக்கும் பெரும் சிக்கல்களை ஏற்படுத்தும். 

என்னென்ன நடவடிக்கைள்? 

மத்திய அரசு மற்றும் ரிசர்வ் வங்கி, வங்கிகள் மற்றும் நிதி நிறுவனங்கள் தங்கக் கடன் வழங்கும் முறையை தொடர்ந்து கண்காணித்து வருகிறது. விதிகளை மீறினால், கடுமையான நடவடிக்கைகள் எடுக்கப்படும்.அது என்னென்ன நடவடிக்கைகள் என்பது பற்றி இந்த பதிவில் பார்ப்போம். 

 அபராதம் 

விதிகளை மீறிய வங்கிகள் மற்றும் நிதி நிறுவனங்களுக்கு அபராதம் விதிக்கப்படும்.அதிகமாக முறைகேடுகளில் ஈடுபடும் நிறுவனங்களுக்கு அவர்களது உரிமத்தை ரத்து செய்யும் நடவடிக்கையும் எடுக்கலாம். வாடிக்கையாளர்களை ஏமாற்றும் தங்க கடன் நிறுவனங்களுக்கு விரைவில் இம்மாதிரியான தண்டனை விதிக்கும் புதிய நடவடிக்கைகள் கொண்டுவரப்படும்.

கண்காணிப்பு முறைகள் வலுப்படுத்தல்

RBI முன்னெச்சரிக்கை நடவடிக்கைகளை அதிகரித்து, தங்கக் கடன் வழங்கும் முறைகளை அடிக்கடி ஆய்வு செய்யும். புதிய கண்காணிப்பு முறைகள் அறிமுகப்படுத்தப்படலாம், இதன் மூலம் வங்கிகள் விதிகளை பின்பற்றுகிறார்களா என துல்லியமாக கண்காணிக்க முடியும்.

இது பற்றி நிதி அமைச்சர் நிர்மலா சீதாராமன் கூறியது என்ன ? 

மக்களவையில் (பிப்ரவரி 10) நடைபெற்ற கேள்வி நேரத்தில், திமுக எம்.பி. கனிமொழி, வங்கி சாரா நிதி நிறுவனங்கள் (NBFCs) திடீர் அறிவிப்பின் பேரில் பொதுமக்களின் நகைகளை ஏலம்விடும் சம்பவங்கள் அதிகரித்துள்ளதாக கவலை வெளியிட்டார். மேலும், நகைக்கடன் அடிப்படையில் வழங்கப்படும் ரொக்கத்தொகையின் உச்சவரம்பு ரூ20 ஆயிரமாக இருப்பதால், மக்கள் சிரமத்தை சந்திக்கின்றனர் என்றார்.

இதற்கு பதிலளித்த நிதியமைச்சர் நிர்மலா சீதாராமன், “தங்க நகைகள் ஏலமாகும் விதிமுறைகளை மீறினால், குறித்த வங்கிகள் மற்றும் NBFC-களுக்கு எதிராக நடவடிக்கை எடுக்கப்படும்” என்று உறுதி அளித்தார்.

மேலும் இது குறித்து அவர் பேசுகையில் “வங்கிக் கணக்கு வைத்திருப் பவர்களுக்கு முறையான சேவை வழங்கப்படுவதை உறுதி செய்யும் நோக்கில் போதுமான அளவில் நோட்டீஸ் அனுப்பப்படும். இருப்பினும், கடன் வாங்கியவர்கள் திருப்பிச் செலுத்த முடியாத சூழலில், வங்கிகள் அல்லது NBFC-கள் தங்க நகைகளை ஏலம்விடுவது தவிர்க்க முடியாத நிலை உருவாகிறது. ஆனால், இந்த செயல்முறையில் விதிமுறைகள் மீறப்பட்டால், அதற்கு எதிராக தக்க நடவடிக்கை எடுக்கப்படும்” எனவும் நிதியமைச்சர் நிர்மலா சீதாராமன் திட்டவட்டமாக தெரிவித்தார்.