தொடர்ச்சியாக ஆர்சிபி தோல்வி! கடும் கோபத்தில் கடுமையாக திட்டிய தினேஷ் கார்த்திக்!

ஐபிஎல் 2025 சீசனில் ராயல் சேலஞ்சர்ஸ் பெங்களூரு (ஆர்சிபி) அணி தனது சொந்த மைதானமான எம். சின்னசாமி மைதானத்தில் தொடர்ந்து இரண்டாவது தோல்வியை சந்தித்த பிறகு, அணியின் பயிற்சியாளரான தினேஷ் கார்த்திக் கடும் அதிருப்தியை வெளிப்படுத்தியுள்ளார். இந்தத் தோல்வியைத் தொடர்ந்து, மைதானத்தின் ஆடுகளம் (பிட்ச்) மற்றும் அதை தயாரித்த கியூரேட்டர் மீது அவர் பல கேள்விகளை எழுப்பியுள்ளார். இந்தச் சம்பவம் கிரிக்கெட் வட்டாரங்களில் பெரும் பரபரப்பை ஏற்படுத்தியுள்ளது.

ஆர்சிபி அணியின் தோல்வி

இந்த சீசன் ஐபிஎல் தொடரில் ஆர்சிபி தனது முதல் சொந்த மைதானப் போட்டியில் குஜராத் டைட்டன்ஸ் அணிக்கு எதிராக 8 விக்கெட் வித்தியாசத்தில் தோல்வியடைந்தது. இந்தப் போட்டியில் முதலில் பேட்டிங் செய்த ஆர்சிபி, 20 ஓவர்களில் 169 ரன்கள் மட்டுமே எடுத்தது. இதைத் தொடர்ந்து, டெல்லி கேபிடல்ஸ் அணிக்கு எதிரான இரண்டாவது போட்டியிலும் ஆர்சிபி 6 விக்கெட் வித்தியாசத்தில் தோல்வியை சந்தித்தது. இந்தப் போட்டியில் ஆர்சிபி 163 ரன்கள் மட்டுமே எடுத்தது, இது சின்னசாமி மைதானத்தின் பரபரப்பான ஆடுகளத்திற்கு ஏற்றதாக இல்லை. இந்த இரண்டு போட்டிகளிலும் ஆர்சிபி அணியின் பேட்ஸ்மேன்கள் பெரிதாக ரன்கள் அடிக்கவில்லை. 
இதனால் அணியின் தோல்வி தவிர்க்க முடியாததாக அமைந்தது.

தினேஷ் கார்த்தி கோபம்

ஆர்சிபி அணியின் பேட்டிங் பயிற்சியாளராக பணியாற்றி வரும் தினேஷ் கார்த்திக், இந்தத் தோல்விகளுக்கு மைதானத்தின் ஆடுகளமே முக்கிய காரணம் என்று குற்றம் சாட்டியுள்ளார். பொதுவாக, சின்னசாமி மைதானம் பேட்ஸ்மேன்களுக்கு சாதகமான ஆடுகளமாக அறியப்படுகிறது. இங்கு அதிக ரன்கள் எடுக்கப்படுவது வழக்கம். ஆனால், இந்த சீசனில் ஆடுகளம் முற்றிலும் மாறுபட்ட தன்மையைக் கொண்டிருந்தது.

எனவே இது குறித்து தினேஷ் கார்த்திக் பேசுகையில் “நாங்கள் நல்ல ஆடுகளங்களை எதிர்பார்த்தோம், ஆனால் இந்த இரண்டு போட்டிகளிலும் ஆடுகளம் பேட்டிங்கிற்கு சவாலாக இருந்தது. பேட்ஸ்மேன்களுக்கு உதவாத ஒரு ஆடுகளமாக இது இருந்தது. இது ரசிகர்களுக்கும், ஒளிபரப்பாளர்களுக்கும் பிடித்தமான அதிக ரன்கள் எடுக்கும் ஆட்டத்தை வழங்கவில்லை.” மேலும், அவர் ஆடுகளத்தை தயாரித்த கியூரேட்டருடன் இது குறித்து பேச உள்ளதாகவும், அவர்கள் மீது நம்பிக்கை வைத்திருப்பதாகவும் கூறினார். ஆனால், அவருடைய பேச்சில் ஆடுகளத்தின் தரம் குறித்து தெளிவான அதிருப்தி வெளிப்பட்டது.

ஆடுகளத்தின் தன்மை

எம். சின்னசாமி மைதானத்தின் ஆடுகளம் இந்த சீசனில் மெதுவாகவும், ஸ்பின்னர்களுக்கு உதவுவதாகவும் இருந்தது. இது ஆர்சிபி அணியின் பேட்டிங் உத்திக்கு பொருந்தவில்லை. ஆர்சிபி அணியில் விராட் கோலி, ரஜத் பட்டிதார் போன்ற அதிரடி வீரர்கள் இருந்தாலும், அவர்களால் இந்த ஆடுகளத்தில் சுதந்திரமாக ஆட முடியவில்லை. முதல் போட்டியில் குஜராத் டைட்டன்ஸ் அணியின் பந்துவீச்சாளர்கள், குறிப்பாக ஸ்பின்னர்கள், ஆடுகளத்தை சரியாகப் பயன்படுத்தி ஆர்சிபியை கட்டுப்படுத்தினர். அதேபோல், டெல்லி கேபிடல்ஸ் அணியின் குல்தீப் யாதவ் மற்றும் விப்ராஜ் நிகம் போன்ற ஸ்பின்னர்கள் ஆர்சிபி பேட்ஸ்மேன்களை கட்டுப்படுத்தினர்.

கார்த்திக் இது குறித்து மேலும் கூறுகையில், "இந்த ஆடுகளத்தில் ஸ்ட்ரைக் ரொட்டேட் செய்வது கடினமாக இருந்தது. பெரிய ஷாட்கள் ஆட முயற்சித்தால் விக்கெட்டுகள் விழுந்தன. இது ஒரு டி20 போட்டிக்கு ஏற்ற ஆடுகளமாக இல்லை" எனவும் தினேஷ் கார்த்திக் தெரிவித்தார்.